Қазақстан Республикасының халықтарының тілдер мерекесі күні қарсаңында Іле ауданы Н.Тілендиев аулындағы «№ 26 орта мектебі» 05.09.2022ж «Тіл ғұмыры-ұлт ғұмыры» атты тілдер айлығының ашылу кешін жоспарға сәйкес өткізді.

Жиынның мақсаты: Оқушылардың өз ана тіліне деген құрмет сезімін арттыру, тіл мәртебесін көтеру, таза сөйлеуге үйрету, өз ұлтына, еліне деген сүйіспеншілігін ояту.Қазақстан мемлекетінде тұратын барлық халықтардың тілдерін құрметтеу.
Салтанатты кешімізді облыстық би байқауларының жүлдегерлері, мектебіміздің мың бұралған бишілері «Қазақ» биімен ашты. Ал, 8 «Ә» сыныбы жігіттері ауыздан ауызға көше жүріп, сырланып, бүкіл халық қазынасына айналған би шешендеріміздің әңгімесінен көрініс өрбіте отырып, халық даналығын , тіл байлығын көрсетуге тырысты. Әсерлі көріністі тілі, діні бөлек болса да жүректері қазағымның домбырасымен үндесіп жатқан 8 «Б» сынып оқушылары Падерин Кирилл, Майемген Даниялдың орындауындағы « Адай» күйі дүбірлетіп өтсе, орта буын оқушылары тіл туралы орыс және ағылшын тілінде өлеңдер оқыды.
Тіл – ұлттың жаны, халықтығының асыл белгісі, намысы, тыныс тіршілігінің көзі, Ата Заңымен қорғалатын, еркіндігінің үні. Оны құрметтеп, қорғау, келешек ұрпаққа жеткізу, Қазақстанның бақытты да парасатты, білімді де еңбекқор ұл-қыздары бізге ғасырлар бойы ата-бабаларымыздан жеткен аманат. Оны дәріптеу біздің міндетіміз.